BOIPLUS SPORTS BLOG

Bakari Kagoma, Dar
MKUU wa Idara ya Habari na Mawasiliano wa klabu ya Yanga Jerry Muro amesema kuwa ataendelea na majukumu yake kama kawaida mpaka atapopelekewa nakala ya hukumu toka Shirikisho la mpira wa miguu Tanzania TFF.

Julai 7 mwaka huu Kamati ya maadili ya TFF chini ya Mwenyekiti wake Wakili msomi Wilson Ogunde ilimfungia Jerry kutojihusisha na masuala ya soka kwa mwaka mmoja na faini ya shilingi milioni moja baada ya kukutwa na makosa matatu ya kimaadili.

Akizungumza na Waandishi wa Habari makao makuu ya klabu hiyo yaliyopo mitaa ya Twiga na Jangwani jijini Dar es Salaam Jerry alisema amepokea barua ya kusimamishwa kazi ila bado hakupewa nakala ya hukumu kwahiyo haimzuii kuendelea na majukumu yake ndani ya Yanga.

"Nilikuwa likizo, nimeripoti kazini Agosti mosi kuendelea na majukumu yangu kama Ofisa Habari wa klabu ya Yanga huku nikisubiri nakala ya hukumu toka TFF itakayonipa mwanga wa kitu cha kufanya kwa sasa naendelea na kazi kama kawaida," alisema Jerry.

Aidha Jerry alisema pia atakapota nakala hiyo ataangalia uwezekano wa kukata rufaa huku akifuata maagizo toka kwa mwajiri wake klabu ya Yanga wa kitu gani cha kufanya.

" Kuna mambo mawili nitakayofanya kama kukata rufaa au kusikiliza mwajiri wangu anataka nini," alisema Jerry.

Post a Comment

 
Top