BOIPLUS SPORTS BLOG

Mwandishi wetu
HATIMAYE Shirikisho la mpira wa miguu Tanzania (TFF) kupitia kwa Kamati ya Katiba, Sheria na Hadhi za Wachezaji imetoa hukumu ya beki Hassan Kessi aliyesajiliwa na Yanga huku akiwa bado na mkataba na Simba mwezi Juni mwaka huu.

Sakata hilo limechukua miezi sita kupatiwa ufumbuzi ambapo leo kamati hiyo ndiyo imetoa majibu huku klabu ya Simba ikiibuka mshindi na Kamati hiyo imeiamuru ya Yanga kuwalipa fidia kwa kosa la kukiuka kanuni.

Baada ya kupitia mawasilisho ya pande zote kwa njia ya mahojiano, na vielelezo Kamati hiyo imebaini mambo yafuatayo ambayo yanapaswa kuchukuliwa hatua za haraka:

1. Mchezaji Hassan Hamis Ramadhan au Hassan Kessy alikuwa na Mkataba na Klabu ya Simba uliokuwa unaishia tarehe 15/06/2016.

2. Yanga walikiri mbele ya Kamati kupeleka jina la Mchezaji Hassan Ramadhani Kessy huko Shirikisho la Mpira wa Miguu Afrika (CAF) tarehe 10/06/2016 huku mchezaji huyo akiwa ndani ya mkataba na klabu ya Simba.

3. TFF kupitia Sekretarieti yake ilikuwa na nafasi ya kuweza kuielekeza Yanga hatua stahiki za kuchukua ikiwa ni pamoja na kuwasiliana na Klabu ya Simba kama taratibu zinavyoelekeza. Kama hatua hii ingechukuliwa kwa wakati mwafaka mgogoro huu usingekuwa na sura ya sasa na pengine usingekuwepo.

4. Simba SC walileta machapisho yanayotokana na Mtandao/blog wa mtu waliomtaja kuwa ni Bin Zubeiry ukimwonyesha Mchezaji yuko na viongozi wa Yanga.

5. Yanga ilionesha Mkataba iliosainiwa na Hassan Hamis Kessy tarehe 20/6/2016 na hivyo hakukuwa na sababu ya msingi ya kufanya mambo yaliyoainishwa kwenye kipengele cha 2 and cha 4 kabla ya kumalizika kwa mkataba kati mchezaji Haasan Kessy na Klabu ya Simba.

6. Bila kuathiri hadhi ya wanachama wengine wa TFF, Klabu ya Simba ni brand kubwa kama ilivyo Klabu ya Yanga umakini mkubwa ulipaswa kutumika katika kushughulikia brand hizi ili kuepuka madhara yasiyokuwa ya lazima.



HATUA:

Kitendo cha Klabu ya Yanga kupeleka jina la mchezaji wa klabu nyingine CAF huku mchezaji huyo akiwa ndani ya mkataba na mwanachama mwingine wa TFF ni kosa kubwa kwa mujibu wa kanuni za ligi kifungu 69[5] ambalo linapaswa kupewa adhabu itakayopelekea wanachama wote kuheshimu nafasi ya TFF kwenye suala la usajili na sio kuanza kwenda CAF au kwingineko ili kulinda integrity ya soka la Tanzania. 

Klabu ya Yanga inatozwa faini ya Sh 3,000,000 (Sh milioni tatu) kwa mujibu wa kanuni na fidia kwa klabu ya Simba ya Sh 50,000,000 (Shilingi milioni hamsini).

Ofisa wa TTF aliyehusika ama kwa kushirikiana na Uongozi wa Klabu ya Yanga au kwa kutochukua hatua stahiki kwa wakati apelekwe kwenye mamlaka yake ya nidhamu, yaani, Katibu Mkuu wa TFF ili hatua stahiki ziweze kuchukuliwa dhidi yake.

Post a Comment

 
Top